Äre Connectivitéitsbong fir de Festnetz-Internetabonnement

Als Beneficiaire vun der Allocation de vie chère fir d’Joer 2023 kënnt Dir vun enger Remise vun 10 Euro de Mount op Ärem Festnetz-Internetabonnement, deen op Ären Haaptwunnsëtz ugemellt ass, profitéieren. Dës Remise kënnt Dir bei Ärem Internetbedreiwer ufroen, soubal Dir Äre Connectivitéitsbong kritt hutt. Dëse gëllt fir dat ganzt Joer 2024.

All Stot, deen d’Allocation de vie chère vum Fonds national de solidarité fir d’Joer 2023 kritt, kann vun dëser Remise profitéieren.

D’Remise betrëfft ausschliisslech Ären Festnetz-Internetabonnement an se ass op 10 Euro de Mount fixéiert. D’Remise deckt nëmmen den Festnetz-Internetabonnement, deen op den Haaptwunnsëtz vum Stot ugemellt ass

Dir kënnt Iech mat Ärem Connectivitéitsbong, deen Dir per Post geschéckt kritt hutt, bei engem Guichet vun Ärem Internetbedreiwer presentéieren oder d’Uweisunge vun Ärem Internetbedreiwer befollegen (fir zousätzlech Informatioune gitt w.e.g op déi entspriechend Internetsäit vun Ärem Internetbedreiwer. D’Links fannt Dir weider uewen). Follgend Internetbedreiwer bidden d’Remise un: Hei klicken

Nee, en neie Festnetz-Internetabonnement ass net néideg. D’Remise vun 10 Euro de Mount gëllt och fir Ären aktuelle Festnetz-Internetabonnement.

Dir kënnt d’Remise bei Ärem Internetbedreiwer ufroen, esoubal Dir de Connectivitéitsbong per Post kritt hutt. Dir profitéiert ab deem Mount vun der Remise, wou Dir de Bong aktivéiert hutt – fréistens ab Januar 2024.

D’Remise vun 10 Euro de Mount gëllt bis Dezember 2024 a kann zu all Zäitpunkt vum Joer ugefrot ginn.

De Fonds national de solidarité, deen fir d’Verdeelung vun der Allocation de vie chère zoustänneg ass, schéckt d’Connectivitéitsbonge per Post eraus. Wann Dir als Beneficiaire vun der Allocation de vie chère fir d’Joer 2023 kee Connectivitéitsbong op d’Adress vun Ärem Haaptwunnsëtz geschéckt krut, kënnt Dir Iech un de Fonds national de solidarité riichten.

D’Lëscht mat den Internetbedreiwer, déi d’Remise ubidden, gëtt reegelméisseg aktualiséiert. Dir sidd agelueden, dës Internetsäit reegelméisseg ze consultéieren, fir déi néideg Informatiounen ze fannen.

Bei weidere Froen kënnt Dir Iech gären un Ären Internetbedreiwer riichten.